Ibilgailuen arautegiari alegazio eta iradokizunak aurkezteko epea

2010-05-26T12:54:00+02:00 2010-05-26T12:54:00+02:00 2010-05-26T12:54:00+02:00

Ekainaren 19a arte, oinezkoen kaleetarako ibilgailuen arautegi berria aztertu eta alegazioak aurkezteko aukera daukate herritarrek. Udalbatzak maiatzaren 4ko bilkuran eman zion behin behineko onarpena arautegi proposamenari. Orain, hilabeteko epea zabaldu da, edozein pertsona fisiko edo juridikok dokumentua aztertu eta, kasu bada, alegazio eta iradokizunak aurkezteko. Alegazio edo iradokizunik jasoko ez balitz, arautegia behin betirako onartuta geratuko da automatikoki, Udalbatzak berriz erabakia hartu beharrik gabe.

Gai hau aztertzeko, herritarren foro bat sortu zen joan den udazkenean, eta hainbat bilera eman ditu auzia eztabaidatzen. Foroak adostutako proposamena da Udalbatzak ontzat eman zuena, ezer aldatu gabe.

Arautegi berriak oinezkoentzat izendatzen ditu Salbador, Lasao, San Roke eta Maala kaleak, hala nola Espaloia kafe antzokiko bidea eta plazatxoa, eta gune horietan ibilgailuen erabilera mugatzen du.

Arautegia udal web gunean dago ikusgai: http://www.elgeta.org/udala/elgeta-danon-artian/autoen-erabilera-herrian. Bestela, udaletxeko idazkaritzan aztertzeko aukera dago.