Tarteka elurra ari du baina errepidea garbi dago

2010-12-03T09:01:00+01:00 2010-12-03T09:01:00+01:00 2010-12-03T09:01:00+01:00
Ertzaintzak adierazi duenez, Elgetako errepideak garbi daude eta ez dago inolako arazorik. Hori bai, tarteka elurra ari du eta kontuz gidatzeko eskatu dute. Elegtako Udalak, Elgeta-Bergara bitarteko errepidea erabiltzeko gomendatu du. Izan ere, elurra kentzeko makina lehenengo errepide horretatik igarotzen da. Ondorengo orduetarako elurra botako duela iragarri dute 200-300 metrotan. Arratsaldean 500 metrora igoko da ordea elur maila eta ez da apenas prezipitaziorik izango. Aste bukaerarako hego haizea dator eta tenperaturak igo egongo dira. Jarraian Euskalmet-en iragarpena:

Zapatua, abenduak 4

Larunbatean hego haizea ibiliko da eta eguraldiak hobera egingo du apur bat, ateri egongo baita egun osoz. Goizaldean ostarteak zabalduko dira eta izotza egingo du; goizeko lehen orduak ere hotzak izango dira, baina egunez, tenperaturak gora egingo du pixka bat. Arratsalde partean, hodeiak ugaritzen joango dira, baina hegoaldetik sartuko zaizkigun goi-hodeiak izango da. Hego-haizeak une batzuetan zakar joko du.

 

Domeka, abenduak 5

Igandean tenperaturak igotzen jarraituko du. Hego-haizea ibiliko da eta horren ondorioz, tenperatura maximoak ez ezik minimoak ere 3-5 ºC gorago igoko dira. Hego-haizea nahiko zakar ibiliko da egun osoz, bereziki mendi inguruetan eta kostaldean. Hodeiak hegoaldean pilatuko dira batez ere, gainera posible da euri pixka bat egitea. Kostaldean hodeitza sareago egongo da eta eguerdi partean ostarteak zabalduko dira.